Pleidleisiwch yn awr dros arwr mwyaf Abertawe

Rydym yn chwilio am arwr mwyaf Abertawe wrth i’r ddinas ddathlu ei hanner canmlwyddiant.

Dyfeisiwyd menter Arwyr Abertawe er mwyn ceisio datrys problem sydd wedi rhannu’r ddinas am genedlaethau – pwy neu beth yw arwr mwyaf ein dinas?

Lluniwyd rhestr o 50 o bobl, lleoedd a digwyddiadau – mae hyd yn oed ci ynddi – er mwyn i bobl pleidleisio arni cyn cyhoeddi’r enillydd ym mis Hydref.

Mae pobl amlwg ar y rhestr megis Dylan Thomas, Bonnie Tyler a Catherine Zeta Jones.

Ond mae hefyd ddigwyddiadau arbennig megis chwe chwech mewn pelawd Gary Sobers yn San Helen, dyrchafiad yr Elyrch i’r Uwch-gynghrair a gorchestion achub bywyd dwy fenyw o Abertawe mwy na 150 o flynyddoedd yn ôl.

Mae llefydd hefyd megis Traeth Rhosili a Maes San Helen – yr unig leoliad ym Mhrydain lle mae pob tîm rygbi a chriced cenedlaethol yn Hemisffer y De wedi cael eu curo gan y tîm lleol.

Ac, wrth gwrs, mae Jac Abertawe, y labrador du a oedd wedi ennill enwogrwydd rhyngwladol trwy achub bywydau nifer o bobl a oedd wedi disgyn i ddociau’r ddinas.

Dywedodd Robert Francis-Davies, Aelod Cabinet Cyngor Abertawe dros Fuddsoddi, Adfywio a Thwristiaeth, y bydd y broses o ddod o hyd i arwr mwyaf Abertawe yn arwain at ddadlau mawr ar draws y ddinas.

Meddai, “Pan rydych yn llunio rhestr fer o enwau, lleoedd a digwyddiadau rydych yn dechrau sylweddoli mor anhygoel yw ein dinas.

“Mae Abertawe wedi bod yn gartref i arloeswyr busnesau a’r celfyddydau creadigol a champau anhygoel ym meysydd cerddoriaeth, chwaraeon a ffotograffiaeth. Mae pobl ein dinas wedi cymryd rhan mewn gweithredoedd dewr anhygoel ac eiliadau o fawredd ac ymroddiad syfrdanol, neu wedi bod yn dyst iddynt.

“Yn eu ffyrdd gwahanol, mae’r rhestr o 50 eisoes yn arwyr Abertawe. Y gwirionedd yw y gallem fod wedi cynnwys llawer mwy o bobl, digwyddiadau a lleoedd eiconig.

“Ond rydym yn gobeithio y bydd y cyhoedd yn pleidleisio dros eu hoff arwr ar y rhestr ac efallai dod â’r ddadl am arwr mwyaf Abertawe i ben am y 50 mlynedd nesaf o leiaf.”

Ychwanegodd, “Mae Arwyr Abertawe yn rhan o ddathliadau Abertawe 50 – cyfle i breswylwyr gymryd rhan wrth ddathlu ein statws fel dinas, a gyhoeddwyd gan Dywysog Cymru ar 3 Gorffennaf, 1969.

“Rydym wedi cael partïon stryd, Tocynnau Aur i ddigwyddiadau na all arian eu prynu ac, wrth gwrs, ymweliad gan Dywysog Cymru ar hanner canmlwyddiant ei gyhoeddiad.

“Ond mae llawer mwy i ddod ac mae’n hawdd i bobl gymryd rhan.”

50 iconic people, places, events and more. But who or what is Swansea’s greatest icon? You decide.